خیبر پختونخوا پولیس نے دہشت گردوں کو سوات چھوڑنے کی ڈیڈ لائن دے دی

(باخبر سوات ڈاٹ کام)خیبر پختون خوا پولیس نے سوات کے بالائی علاقوں میں موجود دہشت گردوں کو 12 اگست رات بارہ بجے کی ڈیڈ لائن دے دی۔ ساتھ یہ بھی کہا ہے کہ وہ رات بارہ بجے تک سوات اور پاکستان چھوڑ دیں۔ ایسا نہ کرنے کی صورت میں آج ہفتہ سے پولیس ان کے خلاف آپریشن کا آغاز کرے گی۔ اس بات کا فیصلہ انسپکٹر جنرل آف پولیس خیبر پختون خوا کی صدارت میں اجلاس میں کیا گیا، جو پولیس ریسٹ ہاوس فضاگٹ سوات میں منعقد ہوا۔ اجلاس میں پولیس کے اعلیٰ حکام نے شرکت کی۔ ذرائع کے مطابق آئی جی معظم جاہ انصاری نے پولیس افسران پر واضح کیا کہ کسی صورت میں دہشت گردوں اور ان کے ٹھکانوں کو برداشت نہیں کیا جائیگا۔ جو سوات کی سرحدی علاقے ہیں، وہاں پر پولیس کی چوکیاں بنائے جائیں اور گشت بڑھادی جائے۔