زرعی تحقیقاتی انسٹی ٹیوٹ کا خاتمہ، کسانوں کا نشاط چوک میں مظاہرہ

سوات     (باخبر سوات ڈاٹ کام)     سوات میں زرعی تحقیقاتی انسٹی ٹیوٹ کے مبینہ خاتمے کے خلاف کسانوں نے نشاط چوک مینگورہ میں احتجاجی مظاہرہ کیا۔ مظاہرین سے اپنے خطاب میں زمین دار خورشید علی خان، محمد سلیم اور دیگر نے کہا کہ سوات میں زرعی تحقیقاتی ادارہ کا خاتمہ سوات سے زراعت کا خاتمہ ہے۔ اس ادارے کے خاتمے سے سوات میں آہستہ آہستہ زراعت کا خاتمہ ہوجائے گا۔ غلے اور پھلوں کی پیدوار ختم ہو جائے گی۔ انہوں نے کہا کہ ملک میں اس وقت 80 فیصد آڑو کی پیداوار سوات کر رہا ہے، جو ختم ہو جائے گی۔ اس ادارہ کا خاتمہ سوات کے کسانوں اور عوام کا معاشی قتل ہوگا۔ انہوں نے کہاکہ زرعی یونیورسٹی سوات کی اہم ضرورت ہے۔ یونیورسٹی بنانے کے لئے ایک اہم ادارہ کا خاتمہ نہیں ہونا چاہیے۔ صوبائی حکومت زرعی یونیورسٹی کے لئے کسی اور جگہ زمین کا انتخاب کرلے۔