سوات سول سوسائٹی کا پولیس گردی کے خلاف مظاہرہ

(باخبر سوات ڈاٹ کام)سوات کی سول سوسائٹی نے مردان کے طلبہ پر پولیس کے تشدد اور انہیں جیل بھیجنے کے خلاف نشاط چوک میں احتجاجی مظاہرہ کیا۔ مظاہرے سے اپنے خطاب میں پختونخوا ملی عوامی پارٹی کے رہنما انور خان باچا لالا نے پولیس کے رویہ کی مذمت کی اور کہا کہ اہلِ سوات چوروں، ڈاکوؤں اور لٹیروں کے خلاف ہیں۔ اگر واقعی پولیس کے پاس مردان کے طلبہ کے خلاف ٹھوس ثبوت ہیں، تو ہم بھی ان کے ساتھ کھڑے ہیں، اور اگر ایسا نہیں ہے، تو ہم ہر اس قوت کی مذمت کرتے ہیں جو سوات اور بالخصوص پشتون قوم کو بدنام کرنے پر تلی ہوئی ہے۔ بلوگرام کے سیاسی و سماجی کارکن عرفان خان چٹان نے کہا کہ اہلِ مردان نے سوات کی شورش میں جو قربانی دی، اس کی مثال ملنا مشکل ہے۔ انہوں نے اہلِ مردان سے معافی مانگتے ہوئے کہا کہ ہم شرمندہ ہیں۔ ہم میں اتنی بھی جرات نہیں کہ اہلِ مردان کے ساتھ اس مشکل میں کھڑے ہوں۔ مظاہرہ کے آخر میں سوات کی سول سوسائٹی نے نعرے لگائے کہ اہلِ مردان ہم شرمندہ ہیں، پولیس گردی نامنظور، پولیس بھی آئین پاکستان اور قانون کی پابندی کرے۔