(باخبر سوات ڈاٹ کام)سوات میں حالیہ بارشوں اور برف باری نے برفانی تودے گرانے کے ساتھ بڑی تباہی پھیلا دی۔ منگل کو تیسرے روز بھی شدید بارش اور بالائی علاقوں میں برف باری کا سلسلہ جاری رہا۔ تحصیل بحرین کے علاقہ لائیکوٹ کے مقام پر بڑا برفانی تودہ گرنے سے بحرین اور کالام کی شاہراہ ہر قسم کی ٹریفک کے لئے بند ہوگئی۔ دونوں جانب گاڑیوں کی لمبی قطاریں لگ گئیں۔ بحرین کے علاقہ اریانی کو باقی ملک سے ملانے والا واحد رابطہ پل کا ایک حصہ گرنے سے آمد ورفت معطل ہوگئی جس کی وجہ سے دو سو سے زائد گھرانے گاؤں میں محصور ہوکر رہ گئے۔ کالام اور مٹلتان کے درمیان برفانی تودہ گرنے سے مین شاہراہ بھی بند ہوگئی۔ سوات کے ندی نالوں میں طغیانی کی وجہ سے کناروں میں رہنے والی آبادی متاثر ہوئی۔ آخری اطلاعات تک اسسٹنٹ کمشنر بحرین کے مطابق بھاری مشینری سے کالام شاہراہ کو ٹریفک کے لئے کھول دیا گیا تھا۔ گاؤں آریانی اور مٹلتان روڈ کھولنے کے لئے کام جاری ہے۔
سوات، بارش و برف باری کا سلسلہ جاری، برفانی تودہ بھی گرگیا
