(باخبر سوات ڈاٹ کام)ضلع سوات میں مون سون بارشوں کے نتیجے میں پیدا ہونے والی صورتحال اور ممکنہ خطرات سے نمٹنے کی تیاریوں کا جائزہ لینے کے لئے اجلاس ڈپٹی کمشنر آفس سیدو شریف میں منعقد ہوا۔ اجلاس کی صدارت ڈپٹی کمشنر سوات جنید خان نے کی۔ اجلاس میں تمام محکموں کے سربراہان شریک ہوئے۔ متعلقہ ضلعی محکموں کی جانب سے اجلاس کو اب تک کی صورتحال، اداروں کی کارکردگی اور ممکنہ خطرات سے نمٹنے کے لئے لائحہ عمل پر تفصیلی بریفنگ دی گئی۔ اجلاس کی صدارت کرتے ہوئے ڈپٹی کمشنر سوات نے نقصانات سے بچاؤ کے لیے تمام وسائل بروئے کار لانے اور ممکنہ سیلاب کے نتیجے میں موثر اقدامات کے لئے ہمہ وقت تیار رہنے کے احکامات جاری کئے۔ ڈپٹی کمشنر سوات نے متعلقہ تحصیل میونسپل کمیٹیوں کے افسران کو مون سون بارشوں کے دوران نکاسیِ آب کے لیے متحرک انداز میں کام کرنے کی ہدایت کی۔
Swat