سنیٹر اعظم سواتی کو انصاف دلایا جائے، سواتی قوم ایسوسی ایشن

(باخبر سوات ڈاٹ کام)چیف جسٹس آف پاکستان، پاک آرمی اور ریاستی ادارے سنیٹر اعظم سواتی کو انصاف دلائیں۔ ایوانِ بالا کے معزز رکن کی عزت محفوظ نہیں، تو کسی بھی پاکستانی کی عزت محفوظ نہیں۔ آج اگر اعظم سواتی کو انصاف فراہم نہیں کیا گیا، تو کل کسی بھی پاکستانی کی عزتِ نفس کو نقصان پہنچ سکتا ہے۔ ان خیالات کا اظہار سواتی قوم ایسو سی ایشن کے صدر فرمان علی سواتی، ڈاکٹر عبداللہ، فضل وہاب بھٹو، محمد زادہ سواتی، رضا خان سواتی، محمد وسیم خان سواتی، ڈاکٹر رحمانی گل سواتی، اُسامہ، بادشاہ محمود، گل زرین خان اور دیگر نے سوات پریس کلب میں پریس کانفرنس اور پریس کلب کے سامنے احتجاجی مظاہرے سے خطاب کرتے ہوئے کیا۔ انہوں نے کہا سینٹر اعظم سواتی کے ساتھ روا رکھے جانے والے ناروا سلوک کی سخت الفاظ میں مذمت کرتے ہیں۔ آج اگر اس عمل کے خلاف ہم نے آواز نہیں اٹھائی، تو کسی بھی پاکستانی کی عزت محفوظ نہیں رہے گی۔