ضلعی انتظامیہ سیاحت کے حوالے سے ہر کمی اور خامی دور کرے گی،ثاقب رضا اسلم

سوات  (باخبرسوات ڈاٹ کام)  ڈپٹی کمشنر سوات ثاقب رضا اسلم نے کہا ہے کہ یومِ آزادی پر سیاحوں کی بڑی تعداد میں سوات آمد اور جوش و خروش سے جشن آزادی کی تقاریب میں شرکت اس بات کا ثبوت ہے کہ سوات میں مکمل طور پر امن قائم ہو چکا اور یہ حقیقت بھی آشکارا ہو چکی ہے کہ اہل وطن کو سوات وادی سمیت پورے ملک بالخصوص خیبرپختونخوا کے چپے چپے سے پیار ہے۔ انہوں نے یقین دلایا کہ سوات کی ضلعی انتظامیہ بھی سیاحوں کو تمام تر سیاحتی سہولیات کی فراہمی میں کوئی کسر نہیں چھوڑے گی۔ وقت گذرنے کے ساتھ ساتھ سیاحت کے حوالے سے ہر کمی اور خامی بھی دور کرتی رہے گی۔ ان خیالات کا اظہار انہوں نے ملم جبہ میں ایک تقریب سے اپنے خطاب میں کیا ۔