سوات (باخبرسوات ڈاٹ کام) وزیر اعلیٰ خیبر پختون خواہ محمود خان کے بھائی اور ضلع کونسل سوات میں اپوزیشن لیڈر احمد خان نے کہا ہے کہ وزیر اعلیٰ خیبر پختونخوا محمود خان سوات کی ترقی میں گہری دلچسپی لے رہے ہیں۔ سوات میں محکمہ اطلاعات کے زیر اہتمام انفارمیشن میڈیا کمپلیکس کا نیا منصوبہ بھی شروع کیا جا رہا ہے، جس میں صوبائی حکومت کے پہلے ٹی وی چینل اور اے ایم ریڈیو کے علاوہ انفارمیشن افسران اور صحافیوں کی تربیت کے لیے انفارمیشن سروس اکیڈمی کا قیام بھی شامل ہے۔ ترقیاتی کام پر ضلع کونسل سوات میں ٹریژری اور اپوزیشن ممبران ایک بن جاتے ہیں اور میونسپل سہولیات کے علاوہ ہم تعلیم وصحت کی سہولیات بڑھانے کے لیے بھی کوشاں ہیں۔ صوبائی حکومت کے علاوہ ڈسٹرکٹ کونسل سوات بھی لوگوں کو صحت کی سہولیات مہیاکرنے کے لیے پوری تندہی سے کوشاں ہے جو ہماری حکومت اور میری اولین ترجیحات میں شامل ہے۔ سیدوشریف ٹیچنگ ہسپتال کے لئے بلاک کو جلد از جلد مکمل کرکے کھولا جا رہا ہے۔ ان خیالات کا اظہارانہوں نے پختونخوا ریڈیو ایف ایم 98سوات کے پروگرام ’’حال احوال‘‘ میں کیا ۔
وزیر اعلیٰ کے پی، سوات کی ترقی میں دلچسپی لے رہے ہیں، احمد خان
