سوات (باخبر سوات ڈاٹ کام) سوات کی ایک اور پہاڑی پر آگ لگ گئی۔ متعدد پودے جل کرراکھ ہوگئے۔ سوات میں اب تک کئی جنگلات اور پہاڑوں پر آگ لگنے کے ایسے واقعات رونما ہوچکے ہیں۔ ریسکیو ترجمان کے مطابق گذشتہ روز مینگورہ کے نواحی علاقے لوئے بنڑ دنگرام کی پہاڑی پر بھی آگ لگ گئی جس سے متعدد پودے جل کر راکھ ہوگئے اور درختوں کو بھی شدید نقصان پہنچا۔ ریسکیو اہلکاروں نے مسلسل دو گھنٹے کی جدوجہد کے بعد آگ پر قابو پالیا۔ اس سے دو روز قبل سیدوشریف کی پہاڑی پر بھی آگ لگ گئی تھی، جب کہ سوات کے مختلف جنگلات میں بھی آگ لگنے کے ایسے کئی واقعات رونما ہوچکے ہیں لیکن تاحال کسی قسم کی تحقیقات نہ ہوسکیں۔