(باخبر سوات ڈاٹ کام)ریجنل پولیس آفیسر ملاکنڈڈویژن ناصر محمود ستی نے کہا ہے کہ کل چار اگست کو ملاکنڈ ڈویژن کے 9 اضلاع میں یومِ شہدائے پولیس عقیدت و احترام کے ساتھ منایا جائے گا۔ 9 اضلاع کے ڈسٹرکٹ پولیس آفیسرز کے ساتھ ویڈیو لنک کے ذریعے اجلاس سے خطاب میں انہوں نے کہا کہ شہدائے پولیس کی قربانیوں کی بدولت آج پورے ملاکنڈ ڈویژن میں امن و امان کی فضا قائم ہے۔ شہدائے پولیس کے افسران اور جوانوں نے ہمارے آج کے لئے اپنے کل کو قربان کیا اور اس دھرتی کی بقا، امن اور خوشحالی کے لئے اپنی جانوں کا نذرانہ پیش کرتے ہوئے جام شہادت نوش کیا۔ انہوں نے مزید کہا کہ ہم سب کو اپنے شہدا کی قربانیوں پر فخر ہے، جن کی دی ہوئی قربانیوں کی بدولت آج ہم امن کی زندگی بسر کر رہے ہیں۔ زندہ قومیں ہمیشہ اپنے شہیدوں کی دی ہوئی قربانیوں کو یاد رکھتی ہیں۔
Swat