صوبائی حکومت اخباری کارکنوں کے مسائل کے حل کیلئے کوشاں ہے، ارشد خان

(باخبر سوات ڈاٹ کام) سیکرٹری اطلاعات و تعلقات عامہ خیبرپختونخوا ارشد خان نے کہا ہے کہ صوبائی حکومت اخبارات اور کارکنوں کے مسائل کے حل کیلئے کوشاں ہے۔ اس کے لئے جامع منصوبہ بندی کی جا رہی ہے۔ ان خیالات کا اظہار انہوں نے ایک روزنامہ کے سوات بیورو کے نئے دفتر کے افتتاح کے موقع پر گفتگو کرتے ہوئے کیا۔ اس موقع پر روزنامہ آج سوات کے بیوروچیف شہزاد عالم، سوات پریس کلب کے سابق چیئرمین رشید اقبال سوات پریس کلب کے سینئر نائب صدر پرویز عالم پاپا اور پاکستان جرنلسٹ ایسوسی ایشن کے صوبائی صدر سہیل باچہ سمیت دیگر بھی موجود تھے۔ ارشد خان نے کہا کہ روزنامہ آج سوات سمیت پورے خیبر پختونخوا کے مسائل اجاگر کرنے اور انہیں حکام تک پہنچانے میں اہم کردار ادا کر رہا ہے۔ انہوں نے کہا کہ موجودہ حکومت اخبارات اور کارکن صحافیوں کی مشکلات سے بخوبی آگاہ ہے اور انکے خاتمے کیلئے جامع منصوبہ بندی کر رہی ہے، جس سے اخباری صنعت اور ان سے وابستہ کارکنان کی مشکلات میں کمی آئیگی۔ انہوں نے کہا کہ سوشل میڈیا کوسٹریم لائن پر لانے کیلئے بھی منصوبہ بندی ہورہی ہے، تاکہ پروپیگنڈے کے بجائے عوام کے مسائل حکام تک پہنچائے اور جھوٹی خبروں کا خاتمہ ہوسکے۔ انہوں نے کہا کہ صوبائی حکومت اخباری مالکان کی مشکلات کے خاتمے کیلئے منظم کؤمہم لانچ کرررہی ہے۔