آبادی میں بے تحاشا اضافے کو روکنا ایک بڑا چیلنج ہے، سٹی میئر شاہد علی خان

(باخبر سوات ڈاٹ کام)سوات سٹی میئر شاہد علی خان نے محکمہ بہبود آبادی کی جانب سے آبادی میں اضافے کے حوالے سے یک روزہ سمینار سے خطاب کرتے ہوئے کہا ہے کہ آبادی میں بے تحاشا اضافہ ملکی ترقی کے لیے ایک بڑا چیلنج بنتا جا رہا ہے۔ ہمیں نہ صرف جدید حکومتی پالیسیوں کی حمایت کرنی ہے بلکہ معاشرتی سطح پر بھی شعور و آگہی کو فروغ دینا ہوگا۔ انہوں نے مزید کہا کہ علمائے کرام کا کردار اس ضمن میں انتہائی اہم ہے۔ کیونکہ وہ عوام کے دلوں تک پہنچنے کی صلاحیت رکھتے ہیں۔ اگر مذہبی رہنما اس پیغام کو اپنے خطبات اور اجتماعات میں شامل کریں تو آبادی کے مسئلے پر مثبت اثرات مرتب ہو سکتے ہیں۔ سیمینار میں ضلع بھر کے مختلف علاقوں سے تعلق رکھنے والے ممتاز علمائے کرام، مقامی انتظامیہ کے نمائندگان، سماجی کارکنان اور عام شہریوں نے بڑی تعداد میں شرکت کی۔