ضلعی انتظامیہ کا پی ڈی ایم کو جلسہ کی اجازت دینے سے انکار

(باخبر سوات ڈاٹ کام) ضلعی انتظامیہ نے پی ڈی ایم کو جلسہ کی اجازت دینے سے انکار کردیا۔کل اتوار کو پی ڈی ایم نے گراسی فٹ بال گراؤنڈ میں جلسہ کا اعلان کیا تھا جس کے لئے تمام انتظامات مکمل کیے گئے ہیں۔ اس جلسہ سے مولانا فضل الرحمان، شہباز شریف، مریم نواز، محمود خان اچکزئی، آفتاب احمد خان شیر پاؤ اور دیگر قائدین خطاب کریں گے۔ جلسہ کے این او سی کے لئے ن لیگ کے صوبائی ڈپٹی جنرل سیکرٹری فضل الرحمان نونو نے ڈپٹی کمشنر کو درخواست دی تھی، جس پر ڈپٹی کمشنر سوات نے ان کو اجازت دینے سے انکار کرتے ہوئے لکھا ہے کہ ضلع بھر میں دہشت گردی، جے یو آئی کے رہنماؤں کو دہشت گردوں سے خطرے اور کورونا وائرس کی وجہ سے اجتماعات پر پابندی کی وجہ سے ان کو جلسہ کی اجازت نہیں دی جاسکتی۔ ن لیگ کے صوبائی جنرل سیکرٹری فضل الرحمان نونو نے رابطہ پر بتایا کہ جلسہ مقررہ تاریخ اور مقررہ وقت پر ہوگا۔ اس سلسلے میں انتظامیہ کا مؤقف جاننے کے لئے ڈی سی سوات جنید خان کو ان کے موبائل نمبر پر بار بار کال کی اور میسج بھی کیا گیا لیکن شام تک انہوں نے کوئی جواب نہیں دیا۔